عديت الأوراق 
ورقة ليوم ميلادي
وورقة ليوم دخولي المدرسة
والمريلة والشنطة والضفيرة قصيرة
وانا واقفة متحيرة
وانت واقف قصادي
- شعرك قصير والبنطلون يرده قصير
زي أحلامنا صغيرة
ورقة تانية
اوعي..بس..حاسبي
انتهينا اخرسي..هس..هس
الشعر يدخل في الحجاب
والجيبة تطول
والبلوزة ..بلاش بلوزة
جوه العباية جسمك يختفي
واتربعي واتكتفي
وويا جوزك ..اتكيفي
وسنين عذاب..جوه الدولاب
مقفول عليك..ألف باب
اتحرري..واتغيري..واتبدلي
ودوبي جوه سنين أنينك
وولعي شمع الشباب مرة ثانية
مهما يكون من زمانك
اعلي لفوق بجناحاتك
ورفرفي..وهفهفي..وصقفي
لسنين جميلة راح تهل
تجري ا ليها تطلع عليها الشمس
وتزرعي ورود جمالك من ألف ميل
علينا تطل..يا ست الكل.
